Во свечена атмосфера, на 28 мај 2025 година, Ротари Клуб Скопје Исток го одбележа својот трет роденден со настан кој ги обедини ротаријанските вредности, бизнис искуствата и визијата за заедничка иднина. Настанот, кој се одржа во партнерство со Business Cafe Македонија, беше вистинска платформа за инспирација, вмрежување и прослава на успешната работа на клубот во изминатите три години.
На свеченоста присуствуваа ротаријанци од повеќе клубови од Македонија, соработници и пријатели, кои имаа можност да слушнат три инспиративни говори од ротаријанци кои се истакнуваат и како успешни професионалци:
Катерина Смиљковиќ, извршен менаџер во Smiljkovic IP и член на РК Академија, говореше за важноста на интегритетот и знаењето:
„Ротари не е само за служење – тоа е патување на постојано учење и поврзување со луѓе кои сакаат да направат разлика,“ истакна таа.
Горан Стојановски, главен директор за бизнис развој во Scalefocus и член на РК Скопје Север, зборуваше за одговорноста на лидерите:
„Лидерството не е позиција, туку влијание. Преку Ротари учиме како да водиме со вредности, а не со титули.“
Лазар Ѓуров, основач на Симбиотика и член на РК Скопје Исток, ја нагласи моќта на заедништвото:
„Кога луѓе со иста мисија ќе се здружат, нема граници за она што можат да го постигнат. Ротари е токму тоа – симбиоза на идеи, визија и акција.“
Претседателот на РК Скопје Исток, Игор Николоски, изрази благодарност до сите членови и гости:
„Овие три години се само почеток. Секој член на нашиот клуб е двигател на промени. Вечерва не славиме само роденден, туку и нашата заедничка решителност да градиме подобра заедница.“
По официјалниот дел, прославата продолжи со коктел и дружење, каде ротаријанската енергија и пријателство се чувствуваа во секој разговор. Настанот уште еднаш потврди дека РК Скопје Исток е клуб кој расте со вредности, соработка и визија.
